Алайга туруктуу жашоо үчүн 50 памирлик кыргыз көчүп келди

Кыргыз өкмөтү 50 памирлик кыргызды үй-бүлөсү менен Алай районунун Сары-Могол айылына көчүрүп келди. Алар мындан ары ушул айылда туруктуу жашашат. Кандаштар бүгүн, 23-декабрда, жаңы конушуна жайгаштырылды.

Азырынча памирлик кыргыздар эски мектептин имаратында. Бул туурасында Ош облустук социалдык башкармалыгынын башчысы Абдубали Балтабаев билдирди.

Анын айтымында, мектептин ичи капиталдык ремонттон өтүп, меш коюлуп жашоого ылайыкташтырылган. Учурда аларды азык-түлүк менен жергиликтүү бийлик камсыздап жатат.

«Алай районунун акимчилиги буга чейин көмүр, тамак-аш жеткирип даярдап турган. Бүгүн Чоң-Алай районунун акими да жардам иретинде бир айга жете турган азык-түлүк алып келди. Күн жылыгандан кийин мамлекет көчүрүлүп келген 10 үй-бүлөгө турак жай салып берет. Бул үчүн жер тилкеси такталып, үй курууга тендер өткөн. Каражат да бөлүнгөн, баары даяр, жаз келери менен курулуш иштери башталат», — деди Балтабаев.

Ошондой эле ал мындан ары дагы памирлик кыргыздарды көчүрүп келүү ыктымал экенин айтат.

«Бул боордошторубуз менен кошо өзүлөрүнүн ханы келди. Ал эки-үч күндөн кийин кайра кетет. Эгер Кыргызстанга келүүнү каалагандар болсо жөнөтө турганын айтты. Андай болсо аларды да турак жай менен камсыздоо маселесин карайбыз», — деди Балтабаев.

Социалдык башкармалыктын жетекчиси Сары-Могол айыл өкмөтүнүн эли жакшы шартта жашай турганын белгиледи. Себеби жанында көмүр кени бар, анда иштегендер аз дегенде күнүнө 2000 сом, жакшы болсо 6000-7000 сом табышат. Мал чарбачылыгы менен алектенүүгө да ылайыктуу жер. Балтабаевдин айтымында, памирлик кыргыздарды ушундай жумушка тартуу боюнча да сүйлөшүүлөр жүрүп жатат.

Булак: Спутник Кыргызстан